Presidential Museum and Library

“Ang pag ibig ko sa iyo ay hindi nag bago kailanman. Ang puso at buhay ko’y iyo lamang. Walang asawa na makakatulad ka sa bait at sa lahat ng bagay. Ang buong kaligayahan ay tinanggap ko sa iyo.” A letter dated October 23, 1934, from President Manuel L. Quezon to his wife Aurora Aragon Quezon, with a postscript to his three children:

____________________

My sweetheart:

Kararating ko lamang dito sa Hospital. Kinakailangang operahin ako, sapagkat ang bato ay malaki at hindi raw makakalabas sa ureter. Mabuti na lamang at hindi ako bumalik nang ako’y nasa Java, at kung bumalik ako ay pihong na desprasia sana ako at walang makakaopera sa akin dian.

Samakalawa ang operasion. Mabuti at wala ka dito para hwag mahirapan ang loob at malalaman mo na lamang kung ako’y mabuti na sa awa ng Dios.

Hindi ko ina-ala-ala ang mangyayari sa akin, sapagkat hindi rao mahirap ang operasion at si Dr. Young ay siya ang magaling sa lahat sa operasiong ito. At lalo pa mandin ay ako’y uma-asa sa awa ng Dios na makapangyayari sa lahat. Gayon man baka sakali may mangyari sa akin, ay ikaw na ang bahala sa ating manga anak. Tapangan mo ang loob mo sapagkat kung magkasakit ka ay walang mag-a-alaga sa atang manga anak.

Dinaramdam kong ang aking buhay ay hindi ko naiukol sa iyo at sa atang manga bata; datapwat ikaw na rin ang nag bigay tibay sa akin upang ipagpatuloy ang pag lilingkod sa ating Inang Bayan.

Buhay ko—Hindi ko hahabaan ang sulat na ito sapagkat ayao kong malinga at sa operasion ay kina-kailangang masaya ang loob ko. Sa kaunting sasabihin ko ay ikaw na ang mag puno.

Patawarin mo ako sa lahat ng aking naging kamalian sa iyo. Ang pag ibig ko sa iyo ay hindi nag bago kailanman. Ang puso at buhay ko’y iyo lamang. Walang asawa na makakatulad ka sa bait at sa lahat ng bagay. Ang buong kaligayahan ay tinanggap ko sa iyo. Sa oras na ito ay paniwalaan mo ang sinasabi ko at manggagaling sa kaibuturan ng aking kaluluwa.

Ipanalangin mo ako at ipanalangin ako ng atang manga anak. Kayong lahat ay hinahalikan ko, yinayakap at ipinananalangin sa ating Dios. Kung ito’y katapusan ay doon ko kayo i-intayin sa kapayapaan ng langit at hindi ko kayo lilimuting bantayan at sa pamamagitan ng Maykapal ay ili-ligtas ko sa madlang panganib.

Adios – buhay ko.

Manuel.

- - -

Baby, Nini, Nonong.

Manga anak kong minamahal,

Magpakabait kayo. Sundin ninyo ang kalooban ng mama at magmahalan kayong lahat. Ipanalangin ninyo ang Papa at patawarin siya.

Hangan sa langit, manga buhay ko,

Ang Papa.

_ _ _

Ito’y hindi ilalagay sa Koreo kung ang operasion ay mahusay ang resulta.

Ako rin.